1.Цаг агаар:
Өнгөрсөн хоногт: Архангай, Булган, Говьсүмбэр, Дархан-Уул, Дорнод, Дорноговь, Дундговь, Өвөрхангай, Орхон, Сэлэнгэ, Төв, Хөвсгөл, Хэнтий аймгуудын зарим хэсгээр бороо орсон.
Өнөөдөр: Төв болон зүүн аймгуудын нутгаар үүлэрхэг, зарим газраар дуу цахилгаантай бороо орно. Бусад нутгаар солигдмол үүлтэй. Салхи баруун аймгуудын нутгаар зүүн өмнөөс, бусад нутгаар баруун хойноос 6-11 м/с, борооны өмнө түр зуур ширүүснэ. Хангай, Хөвсгөл, Хэнтийн уулархаг нутаг, Тэрэлж голын хөндийгөөр 14-19 градус, Их нууруудын хотгор болон Алтайн өвөр говиор 27-32 градус, говийн аймгуудын нутгийн өмнөд хэсгээр 21-26 градус, бусад нутгаар 18-23 градус дулаан байна.
Улаанбаатар хотод: Үүлшинэ. Бага зэргийн бороо орно. Салхи баруун хойноос 5-10 м/с, 20-22 градус дулаан байна.
Төлөв байдал: 30-нд төв болон зүүн аймгуудын нутгийн зарим газраар бороо, 7 дугаар сарын 1-нд нутгийн хойд хэсгээр, 2-нд баруун аймгуудын нутаг, зүүн аймгуудын нутгийн зүүн хэсгээр, 3-нд баруун болон төвийн аймгуудын нутгийн зарим газраар түр зуурын дуу цахилгаантай. бороо орно. Салхи борооны өмнө түр зуур 14-16 м/с хүрч ширүүснэ. Алтай, Хангай, Хөвсгөл, Хэнтэйн уулархаг нутаг, Тэрэлж голын хөндийгөөр шөнөдөө 2-7 градус, өдөртөө 15-20 градус, Их нууруудын хотгор, говийн бүс нутгийн өмнөд хэсгээр шөнөдөө 15-20 градус, өдөртөө 28-33 градус, бусад нутгаар шөнөдөө 9-14 градус, өдөртөө 19-24 градус дулаан байна. Хугацааны сүүлчээр дулаарна.
2.Гал түймэр:
Хувийн өмчид гарсан: Сүхбаатар аймгийн Баруун-Урт сумын 7 дугаар багийн Элит хорооллын 2 дугаар гудамжинд Иргэн Б-ын гражийн дээвэр шатаж байна гэсэн дуудлагыг 06.28-ны өдрийн 06:30 цагт хүлээн авсан. Тус аймгийн Онцгой байдлын газрын Гал түймэр унтраах, аврах 15 дугаар ангийн 6 алба хаагч, 2 автомашинтай 2 км замыг туулан 06:33 цагт очиж, 3х10 метрийн хэмжээтэй гражийн дээвэр шатаж байсныг 25 минут ажиллаж унтраасан.
Нийслэлийн Баянгол дүүргийн 23 дугаар хороо, Зүүн Нарангийн 7 дугаар гудамжинд агуулахын дээвэр шатаж байна гэсэн дуудлагыг 06.28-ны өдрийн 16:31 цагт хүлээн авсан. Чингэлтэй дүүргийн Онцгой байдлын хэлтсийн Гал түймэр унтраах, аврах 10 дугаар ангийн 8 алба хаагч, 2 автомашинтай 5 км замыг туулан 16:40 цагт очиж, иргэн Б.Ойдовдоржийн эзэмшлийн “Боззоло” барааны дэлгүүрийн 2х2 метрийн хэмжээтэй агуулахын дээврийн хэсэг шатаж байсныг 15 минут ажиллаж унтраасан.
3.Зам тээврийн осол:
Автозамын осол: Нийслэлийн Баянзүрх дүүргийн 12 дугаар хороо, Дотоод хэргийн их сургуулийн урд талын автозамын зорчих хэсэгт авто замын осол болж, автомашины төмөр хийцэд хүн хавчуулагдсан тухай дуудлагыг 06.28-ны өдрийн 23:09 цагт хүлээн авсан. Нийслэлийн Аврах ангийн 7 алба хаагч, 2 автомашинтай 10 км замыг туулан 23:21 цагт очиж, “Портер” загварын ачааны автомашинд иргэн Б/25 настай, эрэгтэй/, иргэн А /24 настай, эрэгтэй/, иргэн М /19 настай, эмэгтэй/ нар автомашины бүхээгийн хэсэгт хавчуулагдсан байсныг эсэн мэнд гаргаж, Эмнэлгийн байгууллагад шилжүүлэн өгсөн.
4.Эрэн хайх, аврах ажиллагаа:
Эрэн хайх ажиллагаа /сураггүй болсон/: Нийслэлийн Сонгинохайрхан дүүргийн 12 дугаар хороо, “Эрх саран” сувиллын газар Увс аймгийн харьяат иргэн Б /68 настай, эрэгтэй/ 06.26-ны өдрийн 05:30 цагийн орчим сувиллаас гараад сураггүй болсон тухай дуудлагыг 06.26-ны өдрийн 11:26 цагт хүлээн авсан. Нийслэлийн Аврах ангийн 5 алба хаагч, 1 автомашин, Цагдаагийн байгууллагын 10 алба хаагч, 2 автомашин, “Эрх саран” сувиллын 20 ажилтан, 3 автомашин, нийт 35 хүн, 6 автомашинтайгаар ажиллаж, “Эрх саран” сувиллаас “Нисэхийн-Ар”, “Био комбинатын модон гүүр”, “Таван толгойн бетонон гүүр”, “Шувуун фабрик”-ийн чиглэлд “Туул” голын эрэг дагуу нийт 116 км-т эрэн хайх ажиллагааг зохион байгуулсан боловч үр дүнд хүрээгүй тул мөн өдрийн 22:00 цагт зогсоосон.
Дорнод аймгийн Халхгол сумын Цогтсүмбэр багийн 37 дугаар байранд Иргэн Э /64 настай, эрэгтэй, сэтгэцийн эмгэгтэй/ 06.28-ны өдрийн 13 цагийн орчим гэрээсээ явганаар гараад сураггүй алга болсон тухай дуудлагыг мөн өдрийн 14:20 цагт хүлээн авсан. Тус аймгийн Онцгой байдлын газрын Халхгол сум дахь Гал түймэр унтраах, аврах 62 дугаар ангийн 15 алба хаагч, 2 автомашин, Цагдаагийн хэсгийн 1 алба хаагчтай эрэн хайх ажиллагааг мөн өдрийн 14:50 цагаас эхлүүлж, иргэн Э нь сумын төвөөс зүүн урд зүгт 6 км-т “Элсэн манхан” гэдэг газар явж байсан гэсэн иргэний мэдээллийн дагуу тухайн газарт эрэн хайх ажиллагааг зохион байгуулсан боловч үр дүнд хүрээгүй тул 21:00 цагт зогсоосон. 06.29-ний өдрийн 06:00 цагт эрэн хайх ажиллагааг дахин эхлүүлсэн.
Усны осол /эрэн хайх, аврах/: Булган аймгийн Орхон сумын Халиун багийн “Хангал-Өртөө” гэдэг газар /сумын төвөөс зүүн зүгт 172 км-т/ Нийслэлийн Чингэлтэй дүүргийн 19 дүгээр хорооны харьяат иргэн Г/17 настай, эрэгтэй/ 3 найзын хамт мотоциклоор аялж яваад “Орхон” голын усанд осолдсон тухай дуудлагыг 06.27-ны өдрийн 21:20 цагт хүлээн авсан. Тус аймгийн Онцгой байдлын газрын 5 алба хаагч, 1 автомашин, 1 завь, 3 иргэн, 2 мотоциклтойгоор эрэн хайх ажиллагааг зохион байгуулж байна. 06.28-ны өдрийн байдлаар Сэлэнгэ аймгийн Орхонтуул сумын Хонгор-Овоо багийн “Хадан хошуу” гэдэг газар 14 км-т “Орхон” голын усанд эрэн хайх ажиллагааг зохион байгуулж үр дүнд хүрээгүй тул мөн өдрийн 21:00 цагт зогсоосон. 06.29-ний өдрийн 06:00 цагт эхлүүлсэн.
ОНЦГОЙ БАЙДЛЫН ЕРӨНХИЙ ГАЗАР